Realme 3 تطور الفئة المتوسطة
مبدأيا كده لازم نبقى عارفين ان أى شركة بتنزل موبايل فئة متوسطة وعايزاه يبيع لازم يبقى فيه حاجة مميزة وتقدم حاجة مش موجودة فى أى منافس زى ال ريلمى 3 اللى جاى بمعالج قوى جدا وبينزل فى موبايلات أعلى منه بكتير
بجانب موضوع المعالج اللى لسه هنروحله خلينا فى التصميم اللى بصراحة حلو جدا خصوصا انه جاى بحاجة اسمها 3D Gradient Unibody اللى بتخلى ضهر الموبايل جاى بانحناء هتحس ان الضهر داخل معا الشاشة وبيبقى مفيهوش فريمات من الجنب وطبعا فى الفئة دى منتوقعش انها تبقى خامات غير البلاستيك بس مش مشكلة عشان البلاستيك برضه ليه مميزات والمرادى هيكون لامع شوية وهيبقى شكل الموبايل حلو جدا معا الانحناء لكن مش هيبقى Premuim فى ايدك
شاشة الموبايل 6.22 انش IPS بدقة HD Plus بكثافة بيكسلات 270 بيكسل لكل انش
ألوانها الى حدا ما كويسة والسطوع ممتاز وبتيجى ب Dew Drop Notch
الشركة متكلمتش كتير عن الشاشة عشان ما بتقدمش حاجة جديدة
لكن اللى اتكلمو عنه كتير هوا المعالج اللى هيكون Mediatek Helio P70 لنسخة الهند و P60 للنسخة ال Global اللى هتنزل مصر وبصراحة المعالج قوى وصعب اننا نلاقيه فى الفئة السعرية ديه ونفس المعالج ال P70 كان موجود فى موبايل زى Oppo F11 اللى لسه نازل قريب وسعره أعلى بكتير
كمان الموبايل بييجى بنسختين من الذاكرة والرامات النسخة الأولى بتكون 64 جيجا بايت ذاكرة تخزين و 4 جيجا بايت رام و النسخة التانية بتكون 32 جيجا بايت ذاكرة تخزين داخلية و 3 جيجا بايت رام
أما البطارية فبتيجى بسعة خرافية 4230 ميللى أمبير وهو رقم صعب تشوفه فى الفئات ديه خالص وبصراحة الموبايل من قوة البطارية و المعالج وخاصية ال AI APP Management كل ده بيوفر من استهلاك البطارية وهيخليك تنسى تشحنه طول اليوم ومش هتحتاج أصلا انك تشحنه كتير وكمان البطارية بتدعم الشحن السريع عن طريق منفذ Micro USB 2.0
بالنسبة للكاميرات هنلاقى ان Realme قالت فى مؤتمر اعلان الموبايل ان مش عدد الميجا بيكسل وعدد الكاميرات هوا اللى بيخلى الصورة حلوة ولكن العنصر الرئيسى اللى بيخلى الصورة حلوة هوا ال Optimization بتاع الكاميرا أو المعالجة اللى بتتعمل فى الصورة بعد ما تتصور وعشان كده الشركة قدمت خاصيتين فى الكاميرا الأولى هيا Chroma Boost وديه لازمتها ان مهما كانت ظروف الاضائة مثلا لو فى ضباب كتير أو سحاب كتير بتزود ال Dynamic Range وتحلى الألوان وتظبط الصورة والميزة التانية Nightscape وهيا بتجيب تفاصيل فى الكاميرا اللى عينك ممكن متشوفهاش
وغير كده أعلنت الشركة ان الكاميرا الخلفية هتكون مزدوجة الأولى 13 ميجا بيكسل بفتحة عدسة F1.8 والكاميرا التانية 2 ميجا بيكسل بتعمل ك Depth Sensor
أما الكاميرا السيلفى فهتكون 13 ميجا بيكسل بفتحة عدس F2.0 و الكاميرات كلها بتدعم ال HDR وبتصور فيديو بجودة 1080p
طبعا الموبايل مليان مميزات كتيرة وكمان فيه منفذ سماعات 3.5 ميللى وممكن يتركب فيه شريحتين و كارت ميمورى فى نفس الوقت وبصراحة الميزتين دول قليل أوى لما تلاقيهم فى الأجهزة المنافسة ده غير ان طبعا الموبايل فيه بصمة من الضهر وكل المميزات الرهيبة ديه والشكل الجميل معا طبعا الألوان الرهيبة زى الأزرق فى أسود و الأزرق فى سماوى وغيرهم هنلاقى ان المفاجأة هيا
سعر الموبايل اللى بيكون حوالى 130 دولار أى ما يعادل 2300 جنيه مصرى وده بالنسبة لنسخة ال 3 جيجا رام أما النسخة التانية ال 4 جيجا رام فهتكون بحوالى 157 دولار و اللى بيعادل 2750 جنيه مصرى وطبعا الموبايل لما ينزل مصر مش هيبقى بالأسعار ديه أكيد السعر هيزيد لكن برضه بيفض موبايل استثنائى و هيبقى متاح يوم 12 مارس فى الهند و متوقع ينزل فى مصر فى أخر شهر مارس
وكمان الشركة أعلنت عن مفاجأة وهيا النسخة الأقوى Realme 3 Pro واللى متوقع ينزل فى شهر ابريل